ناس كتير بتسأل ايه احسن طريقة تذاكر بيها مادة الكيمياء للثانوية العامة وتجيب بيها الدرجة النهائية ان شاء الله وبكل سهولة 60 من 60

الكيمياء مادة مش سهلة ومش صعبة بردو لو عرفت شوية ملاحظات صغيرة كدا لكنها بتفرق معاك جدا وبتحول المادة من بعبع مخيف الى حيوان أليف تلعب معاه

مبدأيا كدا وبسم الله الرحمن الرحيم, كيمياء يعني معادلات, مش هينفع أبدا تقول انك مذاكر كيمياء كويس الا لما تفهم المعادلات الكيميائية وتحفظها كويس جدا وتعرف توزنها لما أقولك اكتب لي معادلة تحضير المركب الفلاني او معادلة الكشف عن كذا تكتبها فورا لأنك متدرب عليها كويس

علشان تتميز في المعادلات عاوز كتابة كتير اكتب المعادلة بالوزن كذا مرة لحد مل تتلزق في دماغك وتبقى سهلة جدا عليك

بعد كدا بقا نيجي للمذاكرة نفسها, لما تيجي تذاكر الدرس هتركز في كل معلومة مكتوبة كويس جدا وتفهم ان أي معلومة ممكن تجيلك في الامتحان وتساعدك في حل سؤال ملخبط, فاللي انت هتعمله انك هتذاكر بالورقة والقلم وأي معلومة هتكتبها في كشكول خارجي بخط ايدك وبعد ما تخلص مذاكمرة الدرس كله اقرأ الملاحظات اللي كتبتها تاني وتخيل لو حد سألك فيها هتجاوب ازاي

بعد ما تخلص مذاكرة الدرس كله وتفهم كل جزئية فيه وتحفظ كل المعادلات اقفل الكشكول وتخيل انك بتشرح الدرس لحد قدامك واثناء الشرح لو نسيت حاجة ارجع افتح الكشكول او الكتاب اللي ذاكرت منه وافتكرها تاني وارجع اشرحها تاني

وبعد الشرح والفهم التام للدرس هنا بقا ييجي دور الحل, والحل له 5 مستويات لازم تعدي بيهم كلهم علشان تجيب الدرجة النهائية في الامتحان ان شاء الله

اول مستوى من الحل انك تشوف امثلة محلولة على الدرس اللي بتذاكره وتفهم بشكل مبدأي كدا ازاي السؤال ممكن ييجي في الحتة دي وايه طريقة الحل لأن الأسئلة في الامتحان مش هتكون مباشرة فلازم تاخد فكرة كويسة ازاي السؤال ممكن ييجي

المستوى التاني من الحل هو انك تحل تمارين الكتاب الخارجي على الدرس اللي ذاكرته, المستوى ده مهم علشان تتأكد انك فاهم فعلا وتقدر تحل لوحدك, طبعا الأسئلة دي هيكون مجاب عنها في جزء الاجابات بس انت مش هتبص في الاجابات الا لما تجرب نفسك الاول لوحدك وتشوف مستواك في الحل بعد كدا شوف الاجابة

المستوى الثالث من الحل هو انك تمرن نفسك على كل الأفكار الممكنة اللي ممكن ييجي بيها السؤال وده هتعمله لما تحل اسئلة كتاب خارجي تاني, المستوى ده مهم علشان تمرن نفسك تاخد بالك من كل الطرق اللي ممكن السؤال ييجي بيها في الحتة دي علشان لو فكرة من دي جات لك في الامتحان متكونش غريبة عليك

المستوى الرابع من الحل هو حل اسئلة امتحانات ثانوية عامة لأعوام سابقة ونماذج استرشادية على الدرس اللي ذاكرته لان اسئلة امتحان اخر السنة بتكون مكارة جدا ومعمولة علشان تقيس مستوى ذكائك فلازم تتمرن عليها كويس وتعود نفسك تفكر بطريقة مبدعة شوية وانت بتحل امتحان اخر السنة لأن زي ما قلنا ان السؤال اخر السنة مش هيكون مباشر لكن كل سؤال هيكون فيه فكرة

المستوى الخامس من الحل ودي تقدر تسميه ليفل الوحش هو انك تمسك كل الامتحانات بتاعة السنوات السابقة وتقرأ الامتحان كله وتطلع الأسئلة على الدرس اللي ذاكرته وتحلها, فايدة انك تقرأ الامتحان كله حتى لو مخدتش الدروس دي لسه انك تقدر تربط كويس بين الأبواب بتاعة المنهج كله وتمرن عفلك يتنقل من درس لدرس ومن باب لباب بسهولة وده اللي انت هتعمله بالظبط في امتحان اخر السنة فلازم تتمرن عليه من بدري وهتلاقي الامتحانات الكاملة دي في كتب المراجعة النهائية

لو ليك أي سؤال في الكيمياء او في طريقة المذاكرة اكتبه في التعليقات وهرد عليك اشوفك على خير في الفدييو الجاي وبالتوفيق للجميع ان شاء الله.

لحجز كورسات تدريس الكيمياء في مصر والدول العربية للمرحلة الثانوية او الجامعية تواصل معي واتساب من هنا مستر ابراهيم عبد الواحد.